Библиотека православной литературы в воскресной школе

 

Акафист Пресвятой Богородице перед Ея иконой, именуемой «Страстная»

Кондак 1

Избранной Богом Владычице всей твари, благословенной Марии Деве Богородице, приносим смиренное поклонение Святому Твоему образу. Ты же, о Пренепорочная, приими молитву недостойных раб Твоих, почитающих Крестныя страдания Сына Твоего и Бога нашего, со умилением зовущих Ти: Радуйся, Невесто Неневестная.

Икос 1

Ангели предсташа к держимому в объятиях Твоих Сыну Твоему и Богу нашему, показоваху орудия Крестныя, мы же со страхом поклоняемся страстем Сына Твоего, и зовем Ти:

Радуйся, Архангелов удивление;

Радуйся, Тайн Божиих Служительнице.

Радуйся, яко Дух Святый найде на Тя и сила Вышняго осени Тя;

Радуйся, яко рожденный от Тебе есть Сын Божий.

Радуйся, яко приснодевственное семя Твое сотре главу, гнездившагося в змии диавола;

Радуйся, яко Тобою ад огорчися и смерть умертвися.

Радуйся, Невесто Неневестная.

Кондак 2

Видяще, Пренепорочная, яко прииде Господь на землю, милости ради, да постраждет за грехи верующих в Него и вопиющих Ему: Аллилуиа.

Икос 2

Разуме, Пренепорочная, глагол старца Симеона, Тебе же Самой в сердце пройдет оружие, да открыются от многих сердец помышления, тем со умилением зовем Ти:

Радуйся, Херувимов Светлейшая;

Радуйся, вся скорби от Ирода и иудей приявшая.

Радуйся, в пречистом рождестве Твоем сомнение от Иосифа понесшая;

Радуйся, яко во яслех безсловесных Бога повила и положила еси.

Радуйся, яко Тя с Сыном и Богом не име где главу подклонити;

Радуйся, яко Тобою человек бывает Бог, да Бог Адама соделает.

Радуйся, яко Тобою превознесеся человеческое естество;

Радуйся, Невесто Неневестная.

Кондак 3

Силою укрепляема благодатною свыше, претерпе всякую скорбь и тесноту, любезно объят Сына Своего, со Архангелы вопиюще Ему: Аллилуиа.

Икос 3

Имуще святую икону Твою, ‘Страстную’ именуемую, яко шипок благовонный и яко сокровище многоценное, приносим Ти смиренно поклонение, зовуще:

Радуйся, Покровительнице обители Страстной;

Радуйся, изволившая святою иконою Твоею стати на месте сем.

Радуйся, благочестивому царю внушившая устроить обитель иноческую;

Радуйся, Стено нерушимая верных.

Радуйся, инокиням Помощница во спасении;

Радуйся, о всем мире Молитвенница непреложная.

Радуйся, Невесто Неневестная.

Кондак 4

Бурею греховною смущаеми и отягченнии сном нерадения, припадаем святой иконе Твоей, благодарим милостивое посещение Твоею иконою на месте сем, поюще непрестанно Богу песнь: Аллилуиа.

Икос 4

Слышавше православнии людие града Москвы, яко повеле благочестивый царь принести икону нарицаемую ‘Страстною’, сего ради и срете ю много народа с царем, патриархом Иовом и всем Священным Собором, радостно возопиша:

Радуйся, радость и спасение наше;

Радуйся, Святыя Троицы Богогласная Горлице.

Радуйся, воззвание страданий Христовых;

Радуйся, спогребшая в страдании Сына Твоего.

Радуйся, подтверждение всеобщего воскресения;

Радуйся, высокий Кедре нашего безсмертия.

Радуйся, Невесто Неневестная.

Кондак 5

Боготечная звезда указует Тебе путь с Пренепорочным Младенцем. Мы же мысленно со Иосифом на пути сем припадаем, поюще рожденному Господу и Тебе: Аллилуиа.

Икос 5

Видеши, Всенепорочная, наше сокрушение о гресех, не имамы иныя помощи, ни инаго предстательства, токмо Тебе дадеся благодать молитися за ны, сего ради с верою зовем:

Радуйся, молитвами Твоими свобождающая нас пламене геенскаго;

Радуйся, молившаяся за весь мир у Креста Христова.

Радуйся, пламень страстей от человек отгоняющая;

Радуйся, светом пречистыя души Твоея всех просвещающая.

Радуйся, чистотою Твоею Ангелы удивившая;

Радуйся, яко демоны трепещут от пречистаго имени Твоего.

Радуйся, Невесто Неневестная.

Кондак 6

Предстояще у Креста Сына Твоего и Бога нашего, лютое оружие пройде душу Твою, егда распинаху Жизнодавца на лобном месте, посреде двою разбойник, егда воини совлекоша ризы Его и метающие жребий о иматисме Его. Тогда разумная воинства пояху: Аллилуиа.

Икос 6

Возсиявши, яко светлая свеща, у Креста Сына Твоего, горяще любовию матернею, глаголюще: ‘Аще и страждеши на Кресте, но вем Тя, прежде денницы рожденна’. Видевши Пречистая, яко вся тварь вопиет Ти:

Радуйся, яко душею и телом предстоиши у Креста Зиждителю Твоему;

Радуйся, до последняго часа смерти, с Господом не разлучавшаяся.

Радуйся, яко у Креста рекла еси: ‘Вся земля сорыдайте горце, Жизнеподатель зрится, яко мертв’;

Радуйся, Подательница нам вечнаго радования.

Радуйся, Невесто Неневестная.

Кондак 7

Хотящим воспевати страсти Сына Твоего, помози, Владычице, и не отрини молящихся пред чудотворною Твоею иконою и воспевающих из глубины души песнь: Аллилуиа.

Икос 7

Новую милость людем явила еси, Владычице, иконою Твоею, егда принесше ю честно людие во град Москву, донесше до врат Тверских, и, о чудо! Икона Твоя Святая ста неподвижно на месте сем, идеже ныне обитель Пречистому Твоему Имени. Радостно вопием Ти:

Радуйся, Заступнице и Прибежище наше;

Радуйся, всякия скорби и печали отгнание.

Радуйся, благословение всем концем земли;

Радуйся, Невесто Неневестная.

Кондак 8

Странное и преславное чудо богатыя милости Твоея нам, недостойным, являеши, и всем, с любовию притекающим к чудотворней иконе Твоей и вопиющим: Аллилуиа.

Икос 8

Вси роди блажат Тя, Пренепорочная, видя Тя страждущую и молящуюся при Крестном страдании Сына Твоего и вопиющую к Нему: ‘Из прободеннаго Твоего ребра, сладчайший Сыне, источи безсмертие’. Сего ради со умилением зовем Ти:

Радуйся, безсмертныя жизни сподобляющая рабы Твоя;

Радуйся, уготовляющая райския обители благочестно живущим.

Радуйся, Ходатаице вечнаго радования почитающим Тя;

Радуйся, спасение и заступление инокинь, призывающих Тя непрестанно.

Радуйся, покрывающая Своею благодатию всю вселенную;

Радуйся, Невесто Неневестная.

Кондак 9

Вся страждеши при Кресте и вопиеши к распятому Господу: ‘Грядеши на страсть волею, Сыне, от страстей разреши Адама, и сущия от Адама, со беззаконными вменился еси, да от беззакония спасеши человека, зовуща: Аллилуиа!

Икос 9

Ветия многовещанныя не возмогут воспеть страдания Твоя при Кресте. Ты же, о Пречистая, лице со власы терзающи и перси биюще, взывала еси: ‘Сыне, приими дух Мой и не остави Мене Едину. Мы же, недостойнии, умиленными гласы зовем Ти:

Радуйся, помогающая верным в час смерти;

Радуйся, сопровождающая всех христиан по лютым мытарствам.

Радуйся, освобождающая нас от демонскаго удержания;

Радуйся, Заступница христиан на Страшнем Суде Божием.

Радуйся, Ходатаице всем хотящим получити христианскую кончину;

Радуйся, Невесто Неневестная.

Кондак 10

Спасения прося нам, Пречистая, руки Твоя простерши, о многоблагоутробне Спасе, рекла еси, Страсти Твоя чтущих с праведным разбойником Твоим учини и спаси, Милосердие, вопиющая Тебе: Аллилуиа.

Икос 10

Стена еси необоримая, мирови Прибежище, милости Сокровище, приими моления раб Твоих, предстоящих Святому образу Твоему и умильно зовущих Ти:

Радуйся, обрадованная, вечно блажимая Богородице;

Радуйся, грешным и смиренным известное Прибежище.

Радуйся, дев и сирот Заступнице;

Радуйся, людем крепкая Помощнице.

Радуйся, Святителем великое вразумление;

Радуйся, благоговейных иереев Руководительнице.

Радуйся, Невесто Неневестная.

Кондак 11

Пение умиленное и хвалу молебную сподоби приносити пред чудотворною иконою Твоею, Пресвятая Богоневесто, и не отврати лица Твоего от поющих Ти и Богу во веки: Аллилуиа.

Икос 11

Яко светозарное солнце, возсия в храме нашем образ Твой, Страстная Богородице, освящая, сохраняя и спасая от бед всех страждущих и вопиющих с любовию:

Радуйся, сохраняющая благодатию Своею обитель иночествующих;

Радуйся, Помощнице крепкая борющимся со страстьми.

Радуйся, обидимых и угнетенных Заступнице;

Радуйся, нищих и убогих радование.

Радуйся, больных исцеление и подкрепление;

Радуйся, юных вразумление и наставнице.

Радуйся, Невесто Неневестная.

Кондак 12

Благодать Твою ниспосли нам, Благословенная, почитающим Святую икону Твою, и поклоняющимся Пречестным Страстем Сына Твоего с верою поющих: Аллилуиа.

Икос 12

Поюще непрестанно пред Святою иконою Твоею, поклоняемся, величаем и со страхом лобызаем чудотворный образ Твой, радостно взывающе:

Радуйся, вечное наше радование;

Радуйся, воскресения нашего Сокровище.

Радуйся, от рова страстей нас свобождающая;

Радуйся, взыскание погибших и ума лишенных.

Радуйся, исполняющая прошения верных;

Радуйся, уповающим на Тя грехов прощение даруеши.

Радуйся, Невесто Неневестная.

Кондак 13

О, Всепетая Мати, приими недостойных раб Твоих молитву, призри на предстоящия люди пред чудотворной иконою Твоею и усердно поклоняющихся Пречистым Страстем Сына Твоего, просящих избавления от вечныя муки, вопиющих Тебе: Аллилуиа.

(Этот кондак читается трижды, затем икос 1 и кондак 1)

Молитвы перед иконой Пресвятой Богородицы, именуемой «Страстная»

Молитва первая

О Пресвятая Госпоже Владычице Богородице, высши еси всех Ангел и Архангел, и всея твари честнейши, Помощница еси обидимых, ненадеющихся надеяние, убогих Заступница, печальных утешение, алчущих кормительница, нагих одеяние, больных исцеление, грешных спасение, христиан всех поможение и заступление. Спаси, Госпоже, и помилуй раб Твоих, и преосвященные митрополиты, архиепископы и епископы, и весь священнический и иноческий чин, и благоверный правительствующий синклит, и военачальники, и градоначальники, и христолюбивое воинство и доброхоты, и вся православные христианы ризою Твоею честною защити, и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше, на невидимыя и видимыя враги наша. О Всемилостивая Госпоже Владычице Богородице, воздвигни нас из глубины греховныя и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от напрасныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению; и сподоби ны грешныя рабы Твоя, Царствия Сына Твоего, Христа Бога нашего: яко держава Его благословенна и препрославленна, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков. Аминь.

Молитва вторая

О, Пресвятая Владычице, Госпоже Дево Богородице! Приими молитву и усердное поклонение пред чудотворною иконою Твоею, милостиво посети смиренныя и грешныя рабы Твоя, не остави нас погибнути в гресех наших, буди Помощнице и Заступнице всем православным христианам, и в час кончины жизни нашей предстательствуй, о Всенепорочная! Помилуй нас милостию Сына Твоего, Господа нашего Иисуса Христа и Твоим Матерним ходатайством удостой избавитися от вечныя смерти. Аминь.

Тропарь Пресвятой Богородице перед Ея иконой, именуемой «Страстная»

Тропарь, глас 4:

Днесь возсия неизреченно царствующему граду нашему Москве икона Богоматере, и, яко светозарным солнцем, пришествием тоя озарися весь мир, Небесныя силы и души праведных мысленно торжествуют, радующеся, мы же, на ню взирающе, к Богородице со слезами вопием: о Всемилостивая Госпоже, Владычице Богородице, молися из Тебе воплощенному Христу, Богу нашему, да подаст мир и здравие всем христианом по велицей и неизреченней Своей милости.

АКАФИСТ СВЯТИТЕЛЮ И ЧУДОТВОРЦУ НИКОЛАЮ, АРХИЕПИСКОПУ МИР ЛИКИЙСКИХ

Кондак 1

 Возбранный Чудотворче и изрядный угодниче Христов, миру всему источаяй многоценное милости миро и неисчерпаемое чудес море, восхваляю тя любовию, Святителю Николае: ты же, яко имеяй дерзновение ко Господу, от всяких мя бед свободи, да зову ти: Радуйся, Николае, великий Чудотворче.

 Икос 1

 Ангела образом, земнаго суща естеством яви тебе всея твари Создатель; благоплодную бо доброту души твоея провидев, преблаженне Николае, научи всех вопити тебе сице: Радуйся, от утробы матерния очищенный; радуйся, даже до конца освященный. Радуйся, рождением своим родителей удививый; радуйся, силу душевную абие по рождестве явивый. Радуйся, саде земли обетования; радуйся, цвете Божественнаго саждения. Радуйся, лозо добродетельная винограда Христова; радуйся, древо чудоточное рая Иисусова. Радуйся, крине райскаго прозябения; радуйся, миро Христова благоухания. Радуйся, яко тобою отгонится рыдание; радуйся, яко тобою приносится радование. Радуйся, Николае, великий Чудотворче.

  Кондак 2

 Видяще твоих мир излияние, Богомудре, просвещаемся душами и телесы, дивнаго тя мироточца живоносна, Николае, разумеюще: чудесы бо яко водами, благодатию Божиею изливающимися, напаяеши верно вопиющих к Богу: Аллилуиа.

  Икос 2

 Разум неуразуменный вразумляя о Святей Троице, был еси в Никеи со святыми отцы поборник исповедания православныя веры: равна бо Отцу Сына исповедал еси, соприсносущна и сопрестольна, Ариа же безумнаго обличил еси. Сего ради вернии научишася воспевати тебе: Радуйся, великий благочестия столпе; радуйся, верных прибежища граде. Радуйся, твердое Православия укрепление; радуйся, честное Пресвятыя Троицы носило и похваление. Радуйся, Отцу равночестна Сына проповедавый; радуйся, ариа возбесившагося от Собора святых отгнавый. Радуйся, отче, отцев славная красото; радуйся, всех богомудрых премудрая доброто. Радуйся, огненная словеса испущаяй; радуйся, добре стадо свое наставляяй. Радуйся, яко тобою вера утверждается; радуйся, яко тобою ересь низлагается. Радуйся, Николае, великий Чудотворче.

  Кондак 3

 Силою, данною ти свыше, слезу всяку отъял еси от лица люте страждущих, богоносне отче Николае: алчущим бо явился еси кормитель, в пучине морстей сущим изрядный правитель, недугующим исцеление и всем всяк помощник показался еси, вопиющим Богу: Аллилуиа.

  Икос 3

 Имеяше воистинну, отче Николае, с Небесе песнь тебе воспеваема быти, а не от земли: како бо кто от человек возможет твоея святыни величия проповедати; но мы, любовию твоею побеждаеми, вопием ти сице: Радуйся, образе агнцев и пастырей; радуйся, святое очистилище нравов. Радуйся, добродетелей великих вместилище; радуйся, святыни чистое и честное жилище. Радуйся, светильниче всесветлый и вселюбимый; радуйся, свете златозарный и непорочный. Радуйся, достойный Ангелов собеседниче; радуйся, добрый человеков наставниче. Радуйся, правило веры благочестивыя; радуйся, образе кротости духовныя. Радуйся, яко тобою от страстей телесных избавляемся; радуйся, яко тобою сладостей духовных исполняемся. Радуйся, Николае, великий Чудотворче.

  Кондак 4

 Буря недоумения смущает ми ум, како достойно есть пети чудеса твоя, блаженне Николае; никтоже бо может я исчести, аще бы и многим языки имел и глаголати восхотел; но мы дивно Богу в тебе прославляющемуся дерзаем воспевати: Аллилуиа.

  Икос 4

 Слышаша, богомудре Николае, ближнии и дальнии величие чудес твоих, яко по воздуху легкими благодатными крилами навыкл еси сущих в бедах предваряти, скоро от тех избавляя всех, вопиющих к тебе таковая: Радуйся, избавление от печали; радуйся, подаяние благодати. Радуйся, нечаемых зол прогонителю; радуйся, желаемых благих насадителю. Радуйся, скорый утешителю в беде сущих; радуйся, страшный наказателю обидящих. Радуйся, чудес пучино, Богом излиянная; радуйся, закона Христова скрижали, Богописанныя. Радуйся, крепкое падающих возведение; радуйся, право стоящих утверждение. Радуйся, яко тобою всякая лесть обнажается; радуйся, яко тобою всякая истина сбывается. Радуйся, Николае, великий Чудотворче.

  Кондак 5

 Боготечная звезда явился еси, наставляя по морю плавающих люте, имже смерть предстояше вскоре иногда, аще не бы ты предстал еси призывающим тя в помощь, Чудотворче святый Николае; уже бо нестыдно бесом летающим и погрузити корабли хотящим запретив, отгнал еси их, верныя же научил еси спасающему тобою Богу взывати: Аллилуиа.

Икос 5

 Видеша отроковицы, на брак скверный нищеты ради уготованныя, великое твое к нищим милосердие, преблаженне отче Николае, егда старцу родителю их нощию узельцы три злата таяся подал еси, самаго со дщерьми избавляя от падения греховнаго. Того ради слышиши от всех сице: Радуйся, милости превеликия сокровище; радуйся, промышления о людех приятелище. Радуйся, пище и отрадо к тебе прибегающих; радуйся, хлебе неснедаемый алчущих. Радуйся, богатство, бедне живущим на земли Богом данное; радуйся, воздвижение скорое убогих. Радуйся, быстрое нищих услышание; радуйся, скорбящих приятное попечение. Радуйся, триех дев непорочный невестителю; радуйся, чистоты усердный хранителю. Радуйся, ненадежных надеяние; радуйся, всего мира наслаждение. Радуйся, Николае, великий Чудотворче.

Кондак 6

 Проповедует мир весь тебе, преблаженне Николае, скораго в бедах заступника: яко многажды во едином часе по земли путешествующим и по морю плавающим, предваряя, пособствуеши, купно всех от злых сохраняя, вопиющих к Богу: Аллилуиа.

  Икос 6

 Возсиял еси свет животный, избавление нося воеводам, неправедную смерть прияти имущим, тебе, добрый пастырю Николае, призывающим, егда вскоре явлься во сне цареви, устрашил еси его, сих же неврежденных отпустити повелел еси. Сего ради с ними купно и мы благодарственно вопием ти: Радуйся, усердно призывающим тя помогаяй; радуйся, от неправеднаго убиения избавляяй. Радуйся, от лестныя сохраняяй клеветы; радуйся, неправедныя разрушаяй советы. Радуйся, растерзаяй лжу яко паучину; радуйся, возношаяй славно истину. Радуйся, неповинных от уз разрешение; радуйся, и мертвецев оживление. Радуйся, проявителю правды; радуйся, помрачителю неправды. Радуйся, яко тобою неповиннии избавлени от меча; радуйся, яко тобою насладишася света. Радуйся, Николае, великий Чудотворче.

Кондак 7

 Хотя богохульное еретическое отгнати злосмрадие, миро воистинну благовонное, таинственное явился еси, Николае: люди мирейския упасл еси и весь мир своим благодатным миром исполнил еси. И от нас убо богомерзкое греховное злосмрадие отжени, да благоприятно Богу вопием: Аллилуиа.

Икос 7

 Новаго тя Ноя, наставника ковчега спасительнаго разумеем, отче святый Николае, бурю всех лютых разгоняющаго направлением своим, тишину же Божественную приносящаго вопиющим таковая:Радуйся, обуреваемых тихое пристанище; радуйся, утопающих известное хранилище. Радуйся, плавающих посреде пучин добрый кормчий; радуйся, треволнения морская уставляющий. Радуйся, превождение сущих в вихрех; радуйся, согреяние сущих во мразех. Радуйся, сияние, скорбный мрак разгоняющее; радуйся, светило, вся концы земли просвещающее. Радуйся, от бездны греховныя человеки избавляяй; радуйся, в бездну адскую сатану ввергаяй. Радуйся, яко тобою дерзновенно бездну милосердия Божия призываем; радуйся, яко тобою от потопа гнева избавльшеся, мир с Богом обретаем. Радуйся, Николае, великий Чудотворче.

Кондак 8

 Странное чудо является притекающим к тебе, блаженне Николае, священная твоя церковь: в ней бо и малое моление приносяще, велиих недугов приемлем исцеление, аще токмо по Бозе упование на тя возложим, верно вопиюще: Аллилуиа.

Икос 8

 Весь еси всем воистинну помощник, богоносе Николае, и собрал еси вкупе вся прибегающия к тебе, яко свободитель, питатель и врач скорый всем земным, на похвалу всех подвизая вопити к тебе сице:Радуйся, всяких исцелений источниче; радуйся, люте страждущим помощниче. Радуйся, заре, сияющая в нощи греховной блуждающим; радуйся, росо неботочная в знои трудов сущим. Радуйся, подаваяй требующим благостроение; радуйся, уготовляяй просящим изобилие. Радуйся, многажды прошение предваряяй; радуйся, старым сединам силу обновляяй. Радуйся, многих заблудших от пути истиннаго обличителю; радуйся, таин Божиих верный служителю. Радуйся, яко тобою зависть попираем; радуйся, яко тобою благонравное житие исправляем. Радуйся, Николае, великий Чудотворче.

Кондак 9

 Всякия утоли болезни, великий наш заступниче Николае, растворяя благодатная врачевания, услаждающая души наша, сердца же веселящая всех усердно к помощи твоей притекающих, Богу же вопиющих: Аллилуиа.

Икос 9

 Ветия суемудренныя нечестивых видим тобою посрамленныя, богомудре отче Николае: Ариа бо хульника, разделяюща Божество, и Савеллиа, смешающа Святую Троицу, препрел, нас же во православии укрепил еси. Сего ради вопием ти сице: Радуйся, щите, защищаяй благочестие; радуйся, мечу, посекаяй злочестие. Радуйся, учителю Божественных велений; радуйся, губителю богопротивных учений. Радуйся, лествице, Богом утвержденная, еюже восходим к Небеси; радуйся, покрове, Богом зданный, имже покрываются мнози. Радуйся, немудрых умудривый твоими словесы; радуйся, ленивых подвигнувый твоими нравы. Радуйся, светлосте заповедей Божиих неугасимая; радуйся, луче оправданий Господних пресветлая. Радуйся, яко учением твоим сокрушаются еретическия главы; радуйся, яко тобою вернии сподобляются славы. Радуйся, Николае, великий Чудотворче.

Кондак 10

 Спасти хотя душу, плоть твою духови покорил еси воистинну, отче наш Николае: молчаньми бо прежде и бореньми с помыслы, деянию богомыслие приложил еси, богомыслием же разум совершен стяжал еси, имже дерзновенно с Богом и Ангелы беседовал еси, всегда вопия: Аллилуиа.

Икос 10

 Стена еси похваляющим, преблаженне, чудеса твоя и всем к заступлению твоему прибегающим; темже и нас, в добродетели убогих, от нищеты, напасти, недугов и нужд различных свобождай, вопиющих ти с любовию таковая: Радуйся, от убожества вечнаго изымаяй; радуйся, богатство нетленное подаваяй. Радуйся, брашно негиблющее алчущим правды; радуйся, питие неисчерпаемое жаждущим жизни. Радуйся, от мятежа и брани соблюдаяй; радуйся, от уз и пленения свобождаяй. Радуйся, преславный в бедах заступниче; радуйся, превеликий в напастех защитниче. Радуйся, многих от погибели исхитивый; радуйся, безчисленных неврежденно сохранивый. Радуйся, яко тобою лютыя смерти грешнии избегают; радуйся, яко тобою Жизнь Вечную кающиися получают. Радуйся, Николае, великий Чудотворче.

Кондак 11

 Пение Пресвятей Троице паче иных принесл еси, преблаженне Николае, умом, словом и делом: многим бо испытанием правоверная повеления уяснил еси, верою, надеждою и любовию наставляя нас в Троице Единому Богу воспевати: Аллилуиа.

Икос 11

 Светозарную лучу во мраце жития сущим неугасимую видим тя, Богом избранне отче Николае: с невещественными бо ангельскими светы беседуеши о несозданном Троическом Свете, верных же души просвещаеши, вопиющих ти таковая: Радуйся, озарение Трисолнечнаго света; радуйся, деннице незаходимаго солнца. Радуйся, свеще, Божественным пламенем возжженная; радуйся, яко угасил еси бесовский пламень нечестия. Радуйся, светлое правоверия проповедание; радуйся, доброзрачное света Евангельскаго сияние. Радуйся, молние, ереси пожигающая; радуйся, громе, устрашающий соблазняющия. Радуйся, истиннаго научителю разума; радуйся, таинственнаго изъявителю ума. Радуйся, яко тобою попрася поклонение твари; радуйся, яко тобою научихомся поклонятися Творцу в Троице. Радуйся, Николае, великий Чудотворче.

Кондак 12

 Благодать, данную ти от Бога, сведущии, радующеся твою память празднуем по долгу, преславный отче Николае, и к чудному заступлению твоему вседушно притекаем; преславных же твоих деяний, яко песка морскаго и множества звезднаго исчести не могуще, недоумением объяти бывше, вопием к Богу: Аллилуиа.

Икос 12

 Поюще твоя чудеса, восхваляем тя, всехвальне Николае: в тебе бо Бог, в Троице прославляемый, дивно прославися. Но аще и попремногу составленныя от души псалмы и песни приносим ти, Чудотворче святый, ничтоже творим равно дарованию чудес твоих, имже удивляющеся, вопием к тебе таковая: Радуйся, Царя царствующих и Господа господствующих служителю; радуйся, служителей Его небесных сожителю. Радуйся, людем верным поможение; радуйся, рода христианскаго возвышение. Радуйся, победы тезоименитый; радуйся, венченосче нарочитый. Радуйся, всех добродетелей зерцало; радуйся, всех притекающих к тебе крепкое забрало. Радуйся, по Бозе и Богородице все наше упование; радуйся, телес наших здравие и душ спасение. Радуйся, яко тобою от вечныя смерти свобождаемся; радуйся, яко тобою безконечныя жизни сподобляемся. Радуйся, Николае, великий Чудотворче.

Кондак 13

 О пресвятый и пречудный отче Николае, утешение всех скорбящих, нынешнее наше приими приношение и от геенны избавитися нам Господа умоли богоприятным твоим ходатайством, да с тобою воспеваем: Аллилуиа.

  (Этот кондак читается трижды, затем икос 1 и кондак 1).

 

МОЛИТВЫ

 ***

 О всесвятый Николае, угодниче преизрядный Господень, теплый наш заступниче, и везде в скорбех скорый помощниче! Помози ми, грешному и унылому, в настоящем сем житии, умоли Господа Бога даровати ми оставление всех моих грехов, елико согреших от юности моея, во всем житии моем, делом, словом, помышлением и всеми моими чувствы; и во исходе души моея помози ми, окаянному, умоли Господа Бога, всея твари Содетеля, избавити мя воздушных мытарств и вечнаго мучения, да всегда прославляю Отца и Сына и Святаго Духа и твое милостивное предстательство, ныне и присно и во веки веков. Аминь.

 ***

 О добрый наш пастырю и богомудрый наставниче, святителю Христов Николае! Услыши нас грешных, молящихся тебе и призывающих в помощь скорое предстательство твое; виждь нас немощных, отвсюду уловляемых, всякаго блага лишенных и умом от малодушия помраченных; потщися, угодниче Божий, не оставити нас в греховнем плену быти, да не будем в радость врагом нашим и не умрем в лукавых деяниих наших. Моли о нас недостойных Содетеля нашего и Владыку, ему же ты со безплотными лики предстоиши: милостива к нам сотвори Бога нашего в нынешнем житии и в будущем веце, да не воздаст нам по делом нашим и по нечистоте сердец наших, но по своей благости воздаст нам. На твое бо ходатайство уповающе, твоим предстательством хвалимся, твое заступление на помощь призываем, и ко пресвятому образу твоему припадающе, помощи просим: избави нас, угодниче Христов, от зол находящих на нас, и укроти волны страстей и бед возстающих на нас, да ради святых твоих молитв не обымет нас напасть и не погрязнем в пучине греховней и в тине страстей наших. Моли, святителю Христов Николае, Христа Бога нашего, да подаст нам мирное житие и оставление грехов, душам же нашим спасение и велию милость, ныне и присно и во веки веков.

 ***

 О великий заступниче, архиерею Божий, Николае треблаженне, иже подсолнечную осиявый чудесы, призывающим же тя скорый услышатель являйяся, ихже присно предваряеши и спасаеши, и избавляеши, и от бед всяческих изъимаеши, от Бога данною ти чудес и даров благодатию! Услыши мя недостойнаго, с верою тя призывающа и молебное тебе приносяща пение; тебе бо ходатая на умоление ко Христу предлагаю. о пресловущий в чудесех, святителем высото! яко имеяй дерзновение, скоро Владыце предстани, и преподобнии свои руце молебне к Нему простри о мне грешнем, и от Него щедроты благости подаждь ми, и приими мя в свое заступление, и от всех бед и зол мя избави, от нашествия врагов видимых и невидимых свобождая, и тех всех наветы и злохитрства погубляя, и борющих мя во всей жизни моей отражая; прегрешением же моим прощение испроси, и спасена мя Христу представи и Царствия Небеснаго сподоби улучити за множество того человеколюбия, емуже подобает всяка слава, честь и поклонение, со безначальным его Отцем, и с Пресвятым и Благим и Животворящим Духом, ныне и присно и во веки веков.

 ***

 О всехвальный, великий чудотворче, святителю Христов, отче Николае! Молим тя, буди надежда всех христиан, верных защититель, алчущих кормитель, плачущих веселие, болящих врач, по морю плавающих управитель, убогих и сирых питатель и всем скорый помощник и покровитель, да мирное зде поживем житие и да сподобимся видети славу избранных Божиих на небеси и с ними непрестанно воспевати Единаго в Троице покланяемого Бога во веки веков.

 

 Акафист святому пророку  ИЛИИ

Кондак 1

Избранный Богом на обращение Израиля от прелести Вааловы, грозный обличителю царей законопреступных, просиявый пламенною ревностию по Бозе Вседержители, святостию жизни и чудесы, восхищенный плотию твоею на Небеса: и предъити имеяй Второму пришествию Христову, похвальная восписуем ти, пророче Божий Илие; ты же, яко имеяй велие дерзновение ко Господу, от всяких нас зол и обстояний молитвами твоими свобождай, благочестно тебе вопиющих: Радуйся, Илие, великий пророче, Втораго пришествия Христова славный предтече.

Икос 1

Ангел ревностию по Бозе и чистым житием твоим, сый во плоти, пророче, был еси: еще бо младенцу ти бывшу, отец твой Совах виде светлыя Ангелы, беседующия с тобою, огнем тя повивающия и пламенем питающия, еже прознаменоваше пламенную ревность твою по Бозе, силу словес твоих и житие, яко свет, непорочное. Сего ради со удивлением зовем ти таковая: Радуйся, от вечности предызбранный в служение спасению сынов Израилевых. Радуйся, от чрева матерня предуготованный в провозвестника Божественныя истины и благочестия. Радуйся, преславным, бывшим на тебе, видением родителя твоего удививый. Радуйся, девственную чистоту и безмолвие от юности возлюбивый. Радуйся, суету мира сего и вся блага его презревый, душу же твою всецело Господу посвятивый. радуйся, светом премудрости от Бога озаренный и учением благочестия издетства напоенный. Радуйся, Илие, великий пророче, Втораго пришествия Христова славный предтече.

Кондак 2

Видя нечестие и развращение во Израили, преславный пророче, зело духом твоим скорбел еси и ревностию по славе Божией воспламенялся еси; яко сынове Израилевы мерзким идолом поклонишася, от Бога же Истиннаго отступиша, Емуже вся Небесная воинства со страхом вопиют: Аллилуиа.

Икос 2

Разум свой злою волею омрачив, беззаконный царь Израильский Ахав, остави Истиннаго Бога Вседержителя и покланяшеся мерзкому идолу Ваалу, купно же и в царстве своем умножи идолопоклонение и нечестие. Ты же, пророче, исполнен сый велия ревности по Бозе, дерзновенно обличил еси царя, возвестив ему, яко в наказание ему и царства его три лета и месяц шесть не будет дождь, ни роса, и глад велий будет по всей земли. Дивящеся убо толицей ревности твоей по Бозе и велию дерзновению, с любовию зовем ти: Радуйся, небоязненный проповедниче истины и крепкий поборниче благочестия. Радуйся, ревностный нечестия обличителю. Радуйся, к наказанию некающихся грешников долготерпеливаго Бога преклонивый. Радуйся, словом твоим небо заключивый и плодоносную землю неплодну сотворивый. Радуйся, трилетный глад за нечестие людей от Господа испросивый. Радуйся, яко Всевышний Господь дарова тебе в бога Ахаву, якоже древле Моисея фараону. Радуйся, Илие, великий пророче, Втораго пришествия Христова славный предтече.

Кондак 3

Силою молитвы твоея, предивный пророче, воистину заключися небо и не одожди три лета и месяц шесть, и бысть глад велий по всей земли, да поне зноем и гладом томими, нечестивии людие покаются и обратятся ко Господу, со умилением зовуще Ему: Аллилуиа.

Икос 3

Имея велие благоволение к тебе, пророче, Господь восхоте отлучити тя от беззаконных сынов Израиля, да не с ними терпиши глад и жажду, и повеле тебе ити к потоку Хорафову, идеже вранове питаху тя, приносяще хлеб и мясо. Темже приносим тебе похвальная сия: Радуйся, постом и бдением вся земная и суетная помышления истребивый. Радуйся, молитвою и богомыслием ум твой в горняя вперивый. Радуйся, патриархов величание и пророков красото. Радуйся, девственников похвало и преподобных славо. Радуйся, святителей наставниче и мучеников крепосте. Радуйся, яко нечестием и неверием ослепленных сынов Израилевых на путь истины обратил еси. Радуйся, Илие, великий пророче, Втораго пришествия Христова славный предтече.

Кондак 4

Буря велия, разрушающая горы, предыдяше, егда приближашеся к тебе, пророче, в Хориве Господь, таже явися трус, и не в трусе Господь, и по трусе огнь, и не во огни Господь, а по огни бысть глас хлада тонка, и ту явися тебе Господь: Егоже присутствие ощутив, покрыл еси лице твое милотию, со страхом и радостию зовый Ему: Аллилуиа.

Икос 4

Слышав нечестивый царь Ахав повеление твое, о еже собрати вся колена Израилева на гору Кармильскую, и привести на ню студныя пророки Вааловы, абие послав, собра вся, и сам прииде тамо. Ты же, ревнителю славы Божия, хотя конечне посрамити мерзкия идолы и прославити Истиннаго Бога, повелел еси уготовати две жертве, огня же на тыя не возгнещати, рек: «И будет Бог, Иже послушает огнем, Той есть Бог». То слышавше вси людие, реша: «Добр глагол Илиин, да будет тако». Мы же, величающе тя, зовем: Радуйся, великий посланниче Царя Небеснаго и провозвестниче святых велений Его. Радуйся, адаманте, неодолимый в ревности и непоколебимый столпе благочестия. Радуйся, сильный защитниче истины и твердый противоборниче врагов Божиих. Радуйся, нечестия искоренителю и насадителю благочестия. Радуйся, пламенный ревнителю Божественныя славы. Радуйся, яко и в последния дни мира имаши проповедывати Истиннаго Бога и обличати окаяннаго антихриста. Радуйся, Илие, великий пророче, Втораго пришествия Христова славный предтече.

Кондак 5

Боготечную тя звезду погасити мняше беззаконная царица Иезавель: исполнившися бо на тя ярости за погубление студныx ея пророков, хотяше убити тя; ожесточися бо сердце ея и не хотяше веровати чудесем твоим, пророче, и познати Истиннаго Бога, поющи Ему: Аллилуиа.

Икос 5

Видевше вси людие Израилевы, по молитве твоей, огнь от Господа с небесе сшедый на жертву твою, всехвальне пророче, и всю ю пожегший, дрова же, и камень, и персть, и воду потребивый, падоша на лица своя, взывающе: «Воистину Господь Бог, Той есть Бог». И вероваша людие Богови, студныя же пророки ты заклал еси. Славяще убо всесильнаго, чудодеющаго Бога, тебе, угоднику Его, глаголем сице: Радуйся, превелие дерзновение ко Владыце всяческих стяжавый. Радуйся, знамении и чудесы Божественную Истину утвердивый. Радуйся, прелесть демонскую посрамивый, истинную же веру прославивый. Радуйся, неверныя истинным боговедением просветивый. Радуйся, трикратным лиянием на жертвенник воды, тайну Пресвятыя Троицы явивый. Радуйся, яко все естество сущих тебе повиновася, огнь же и вода тебе служаху. Радуйся, Илие, великий пророче, Втораго пришествия Христова славный предтече.

Кондак 6

Проповедник истиннаго боговедения и благочестия явился еси, пророче, не токмо во Израили, но и в стране язычестей, послан быв от Господа в Сарепту Сидонскую к жене вдовице препитатися, паче же да саму ту препитаеши в гладе: имея бо велию чудотворения благодать, умножил еси муку и елей в дому ея неоскудно, дондеже прейде гладное время, и трикратным дуновением, по молитве твоей, воскресил еси умершаго сына ея, поя чудодеющему Богу: Аллилуиа.

Икос 6

Возсияв велиею ревностию по Бозе Вседержители, зело скорбел еси, пророче, яко оставиша завет Его сынове Израилевы, олтари Его раскопаша и пророки избиша. Господь же во утешение твое возвести тебе, яко не весь Израиль отступи от Него, но имать седмь тысящ сокровенных рабов Своих, иже не преклониша колена своя Ваалу. Темже, воспоминающе ревность твою по Бозе, поем ти со благоговением сицевая: Радуйся, верный служителю и ближний друже Господень. Радуйся, образе и похвало благочестивых пастырей. Радуйся, наставниче спасения и просвещение во тьме седящих. Радуйся, защитником истины мужество внушаяй, в подвизех же и страданиих за правду их укрепляяй. Радуйся, яко серафимскою пламенною любовию к Богу горел еси. Радуйся, яко и Господь во всем послушаше тебе и по прошению твоему вся творяше. Радуйся, Илие, великий пророче, Втораго пришествия Христова славный предтече.

Кондак 7

Хотя Человеколюбец Господь явити милосердие Свое кающимся грешником, по прошествии прореченнаго гладнаго времене, низпосла по молитве твоей, пророче, и глаголом уст твоих, на жаждущую землю обильный и мирный дождь; сынове же Израилевы, сподобльшиися толикия милости, во умилении сердца благодарственно возопиша Богу: Аллилуиа.

Икос 7

Новое нечестивый царь Ахав к беззаконием своим приложи злодеяние, егда повеле убити неповиннаго Навуфея и восхити виноград его. Сего ради, обличая законопреступнаго царя, прорекл еси ему, пророче, яко идеже умерщвлен бысть Навуфей, тамо и его кровь свинии и пси полижут, и жену его Иезавель снедят пси, и весь дом его истребится. Ведуще убо мы сбывшееся страшное сие проречение, ужасаемся, зовуще: Радуйся, обидящих и жестокосердных грозный отмстителю. Радуйся, сирых и напаствуемых крепкий заступниче. Радуйся, непочитающих святых праздников Православныя Церкве карателю. Радуйся, продерзых хульников имене Божия низложителю. Радуйся, словом обличения, яко громом, беззаконныя поражаяй. Радуйся, будущая, яко настоящая, ведый и дальняя, яко близ сущая, прорицаяй. Радуйся, Илие, великий пророче, Втораго пришествия Христова славный предтече.

Кондак 8

Странное и преестественное показа Господь о тебе, пророче, промышление, егда повеле алчным и нечадолюбивым враном питати тя в гладе при потоце Хорафове, идеже непрестанно пребывая в молитве и богомыслии, воспевал еси Богу: Аллилуиа.

Икос 8

Весь был еси смирением велиим украшен, пророче Божий, сего ради с гордостию пришедших к тебе двух пятдесятоначальников с воины, да приведут тебе к беззаконному царю Охозии, огнем попалил еси, со смирением же пришедшаго к тебе Авдиа, иже питаше ученики пророческия, помиловал еси. Сего ради приносим ти похвальныя песни сия: Радуйся, гордых смирителю и карателю, смиренных же покрове и заступниче. Радуйся, мздоимных судей наказателю, право же судящим помощниче. Радуйся, правоверному воинству во бранех споборниче, нечестивых же супостат низложителю. Радуйся, премудростию, яко бронею, облеченный и правдою, яко щитом, огражденный. Радуйся, ревностию по Бозе, яко мечем, вооруженный и постом, яко крилами, окриленный. Радуйся, верою, яко шлемом спасения, покровенный и любовию, яко венцем пресветлым, венчанный. Радуйся, Илие, великий пророче, Втораго пришествия Христова славный предтече.

Кондак 9

Всякое человеческое естество зело удивляется, како ты, пречудный пророче, шел еси четыредесять дний, ни ядый, ни пияй, до горы Хорива, идеже сподобился еси преславнаго явления и пресладкия беседы Господа Вседержителя, поя Ему: Аллилуиа.

Икос 9

Ветия многовещанныя недоумеют довольно разумети и изъяснити, како ты, великоимените Илие, во плоти сый человечестей и подобострастен нам быв, восхищен еси с телом твоим на небо, явльшейся тебе колеснице огненней с кони огненными. Славяще убо прославльшаго тя Господа и дивящеся восхищению твоему, благоговейно зовем ти: Радуйся, пречудным воздержанием ветхаго человека в себе умертвивый. Радуйся, огнем Божественныя ревности всякое вещественное помышление в себе попаливый. Радуйся, преложением твоим на небо род человеческий возвеселивый и жизнь вечную уверивый. Радуйся, честию и славою преестественною от Бога почтенный и паче всех древних пророков прославленный. Радуйся, от Ангельских ликов в селениих небесных радостно сретенный. Радуйся, яко имя твое во всем мире почитается, и ревность твоя по Бозе зело прославляется. Радуйся, Илие, великий пророче, Втораго пришествия Христова славный предтече.

Кондак 10

Спасти хотя Всеблагий Бог люди Израилевы от прелести Вааловы, избра тя, великий пророче, во орудие воли Своея и облече тя Божественною властию и силою, да обратиши неверныя, исправиши беззаконныя, просветиши омраченныя и научиши всех вопити Богу: Аллилуиа.

Икос 10

Стена и заступление буди нам, пресвяте пророче, мощным твоим ходатайством утоляя праведный гнев Божий, поражающий нас, грешных и непотребных, бездождием и гладом, еще же тлетворными ветры и болезньми, да избавльшеся от бед, благодарственно поем ти: Радуйся, молитвами твоими небо заключаяй и отверзаяй, плодоносие земли и неплодие от Бога посылаяй. Радуйся, предстательством твоим пред Богом дожди мирны и росу животворную на земная прозябения низводяй. Радуйся, свирепыя волны морския и страшныя бури утишаяй и громами и молниями по воле Божией управляяй. Радуйся, тлетворныя ветры и смертоносныя язвы, поражающия человеки же и скоты, укрощаяй. Радуйся, сирых и вдовиц питателю и щедродательных людей покровителю. Радуйся, яко нечестивых хульников и гонителей правыя веры поражаеши и духов злобы от рабов Божиих прогоняеши. Радуйся, Илие, великий пророче, Втораго пришествия Христова славный предтече.

Кондак 11

Пение умиленное приими от нас, пророче Божий Илие, якоже приял еси прошение Елисеево, егда проси от тебе, да будет дух, иже в тебе, сугуб в нем, и егда, восхищаяся на небо, низпустил еси ему милоть твою, юже он взем, раздели, якоже и ты прежде, Иорданския воды, и бысть наследник действовавшия в тебе Божия благодати; сице и нас покрый милотию твоея милости от всяких бед и обстояний, да со благодарением зовем Богу: Аллилуиа.

Икос 11

Светозарное светило во Израили, всехвальне пророче, был еси, сияя равноангельным житием твоим и мудростию, еще же необычною ревностию по Бозе и чудесы преславными, просвещая люди истинным боговедением и разгоняя мрак идолослужения. Темже восписуем ти похвальная, поюще: Радуйся, лучезарная звездо, сиянием своим озарившая всю вселенную. Радуйся, светоносная свеще, непрестанно горящая и во тьме седящих просвещающая. Радуйся, духом премудрости и разума озаренный, духом совета и крепости исполненный. Радуйся, духом ведения и благочестия просвещенный и духом страха Божия напоенный. Радуйся, высокими добродетельми и преславными чудесы преукрашенный. Радуйся, яко суды Божия на земли исполнял еси, пророки же и цари помазывал еси. Радуйся, Илие, великий пророче, Втораго пришествия Христова славный предтече.

Кондак 12

Благодать велия дана ти бысть от Бога, прехвальне пророче, яко в земней жизни твоей пророчествовал и совершал еси дивная чудеса, таже преестественно восхищен был еси с плотию твоею на небо, по восхищении же твоем дивно предстал еси на Фаворе преобразившемуся Господу и с Ним беседовал еси, и до днесь не престаеши чудодействовати и источати милости и исцеления усердно почитающим тя, Богу же верно вопиющим: Аллилуиа.

Икос 12

Поюще твою пламенную ревность по Бозе и равноангельное житие, дивная же твоя и преславная чудеса и превелие благоволение к тебе Господа, восхваляем тя, великоимените пророче Илие, обаче, не могуще достойно изобразити величие и славу твою, со умилением зовем ти сицевая: Радуйся, ковчеже Божественныя славы и всечестный храме Пресвятыя Троицы. Радуйся, светильниче невечерний Церквей и благовонный цвете рая Божественнаго. Радуйся, благочестивых пустынников руководителю, девственников же наставниче и укрепление. Радуйся, яко грешников к покаянию возбуждаеши и всему роду христианскому жизнь вечную ходатайствуеши. Радуйся, яко во светлостех святых неизреченныя славы наслаждаешися и непрестанно Господа славословиши. Радуйся, яко в конце времен велия знамения и чудеса имаши совершити на утверждение людей во истинней вере и на обличение антихриста. Радуйся, Илие, великий пророче, Втораго пришествия Христова славный предтече.

Кондак 13

О предивный и преславный пророче Божий Илие, превелий ревнителю по Бозе, дожди и бездождие, плодоносие на землю и неплодие от Бога посылаяй! Услыши сие малое, благоговейно приносимое тебе нами моление и твоим теплым ко Господу предстательством сохрани нас от бездождия, глада и смертоносных болезней, подаждь же нам благорастворение воздуха и плодоносие, и дух правыя веры и благочестия, да избавльшеся от вечных мук, сподобимся райскаго блаженства, поюще Богу: Аллилуиа.

(Этот кондак читается трижды, затем икос 1 и кондак 1).

Молитва

О прехвальный и пречудный пророче Божий Илие, просиявый на земли равноангельным житием твоим, пламеннейшею ревностию по Господе Бозе Вседержителе, еще же знамении и чудесы преславными, таже, по крайнему благоволению к тебе Божию, преестественно восхищенный на огненней колеснице с плотию твоею на небо, сподобльшийся беседовати с преобразившимся на Фаворе Спасителем мира, и ныне в райских селениих непрестанно пребываяй и предстояй Престолу Небеснаго Царя! Услыши нас, грешных и непотребных, в час сей предстоящих пред святою твоею иконою и усердно прибегающих к ходатайству твоему. Моли о нас Человеколюбца Бога, да подаст нам дух покаяния и сокрушения о гресех наших и всесильною Своею благодатию да поможет нам оставити пути нечестия, преспевати же во всяком деле блазе; да укрепит нас в борьбе со страстьми и похотьми нашими; да всадит в сердце наше дух смирения и кротости, дух братолюбия и незлобия, дух терпения и целомудрия, дух ревности к славе Божией и спасению ближних. Упраздни молитвами твоими, пророче, злыя обычаи мира, паче же погибельный и тлетворный дух века сего, заражающий христианский род неуважением к Божественней Православной вере, к уставом Святыя Церкве и к заповедем Господним, непочтением к родителем и властем предержащим, и низвергающий людий в бездну нечестия, развращения и погибели. Отврати от нас, пречудне пророче, предстательством твоим праведный гнев Божий и избави вся грады и веси Отечества нашего от бездождия и глада, от страшных бурь и землетрясений, от смертоносных язв и болезней, от нашествия врагов и междоусобныя брани. Испроси, пророче Божий, от Господа пастырем нашим святую ревность по Бозе, сердечное попечение о спасении пасомых, мудрость во учении и управлении, благочестие и крепость во искушениих, судиям испроси нелицеприятие и безкорыстие, правоту и сострадание к обидимым, всем начальствующим попечение о подчиненных, милость и правосудие, подчиненным же покорность и послушание ко властем и усердное исполнение своих обязанностей; да тако в мире и благочестии поживше в сем веце, сподобимся причастия вечных благ в Царствии Господа и Спаса нашего Иисуса Христа, Емуже подобает честь и поклонение со безначальным Его Отцем и Пресвятым Духом во веки веков. Аминь.

Тропарь, глас 4

Во плоти Ангел, пророков основание, вторый предтеча пришествия Христова, Илия славный, свыше пославый Елисееви благодать недуги отгоняти и прокаженныя очищати, темже и почитающим его точит исцеления.

Кондак, глас 2

Пророче и провидче великих дел Бога нашего, Илие великоимените, вещанием твоим уставивый водоточныя облаки, моли о нас единаго Человеколюбца.